Yangiliklar

AzerGold O‘zbekistonda “Akba” oltin konini o‘zlashtirish uchun “qiz” kompaniyasini ro‘yxatdan o‘tkazdi

Kompaniya Qashqadaryo viloyatidagi “Akba” oltin rudasi konini o‘rganish bilan shug‘ullanadi, uning zaxiralari 13 tonnadan ortiq oltin deb baholanmoqda. Litsenziya olingach, 18 oy davom etadigan geologiya-qidiruv ishlari boshlanishi rejalashtirilgan.

Hozirda AzerGold zarur ruxsat beruvchi hujjatlarni rasmiylashtirmoqda. Litsenziya olingach, O‘zbekiston hukumatining tegishli qarori asosida kompaniya geologiya-qidiruv ishlariga kirishishni rejalashtirmoqda.

Shu vaqt ichida mutaxassislar mavjud geologik ma’lumotlarni o‘rganadi, qo‘shimcha qidiruv ishlarini olib boradi va mineral resurslarni JORC xalqaro standartlari bo‘yicha baholaydi.

Bundan tashqari, metallurgik sinovlar, loyihaning atrof-muhitga ta’sirini baholash hamda rudani qazib olish va qayta ishlashning mumkin bo‘lgan texnologiyalarini o‘rganish ko‘zda tutilgan.

Tadqiqotlar natijalariga ko‘ra, konni sanoat miqyosida o‘zlashtirishning maqsadga muvofiqligini aniqlash imkonini beradigan texnik-iqtisodiy asoslash (TIA) tayyorlanadi.

Shu asosda AzerGold investitsiya taklifini shakllantiradi va uni O‘zbekistonning tegishli davlat organlariga taqdim etadi.

“O‘zbekgeologorazvedka” AJ ma’lumotlariga ko‘ra, 2025 yilda “Akba” konida 13 tonnadan ortiq sanoat oltin zaxiralari hisoblab chiqilgan va davlat balansiga qo‘yilgan. Shu bilan birga, keyingi geologiya-qidiruv ishlari 50 tonnagacha qo‘shimcha zaxiralarni aniqlashi mumkin.

Hamkorlik uchun huquqiy asos 2026 yil 17 iyunda AzerGold va O‘zbekiston Tog‘-kon sanoati va geologiya vazirligi o‘rtasida imzolangan konni birgalikda o‘zlashtirish bo‘yicha ramka kelishuvi bilan yaratildi.

AzerGold shuningdek, Navoiy va Nurota shaharlari o‘rtasidagi istiqbolli uchastkalarda geologiya-qidiruv ishlari uchun qo‘shma korxona tashkil etish ustida ishlamoqda.

Shunga oid uch tomonlama kelishuv 17 iyul kuni AzerGold, “O‘zbekgeologorazvedka” AJ va Ozarbayjon-O‘zbekiston investitsiya kompaniyasi o‘rtasida imzolangan.

Hozir hamkorlar ta’sis hujjatlarini kelishmoqda va zarur ruxsatlarni rasmiylashtirmoqda. Korxona tashkil etilgach, bosqichma-bosqich geologik tadqiqotlarga kirishish rejalashtirilgan. Loyiha uchun dastlabki ikki yilga mo‘ljallangan qidiruv ishlari va moliyalashtirish rejasi allaqachon tayyorlangan.

Agar tadqiqotlar foydali qazilmalarning iqtisodiy jihatdan rentabelli zaxiralari mavjudligini tasdiqlasa, tomonlar konlarni birgalikda o‘zlashtirish va investitsiya loyihalarini amalga oshirish imkoniyatini ko‘rib chiqadi.

Bundan tashqari, kompaniyalar O‘zbekiston va Ozarbayjon hududidagi boshqa istiqbolli konlarda geologiya-qidiruv va o‘zlashtirish bo‘yicha hamkorlikni kengaytirishni muhokama qilmoqda.

AzerGold – Ozarbayjonning geologik o‘rganish, qidiruv, konlarni o‘zlashtirish va qimmatbaho metallar ishlab chiqarish bilan shug‘ullanuvchi davlat tog‘-kon kompaniyasi. O‘zbekistonda ro‘yxatdan o‘tgan korxona uning birinchi xorijdagi sho‘ba kompaniyasiga aylandi.

Manba