Yangiliklar (for all)
O‘zbekistonda 2030 yilga borib uran qazib olishni ikki baravar oshirish rejalashtirilmoqda
Prezident Shavkat Mirziyoyev «Navoiyuran» va «Oʻzbek texnologik metallar kombinati» korxonalarini rivojlantirish bo‘yicha rejalarni ko‘rib chiqdi. Bu haqda prezident matbuot xizmati xabar beradi.
Taqdimotda «Oʻzbek texnologik metallar kombinati»ni rivojlantirish istiqbollari taqdim etildi. Korxona geologiya-qidiruv va xomashyo qazib olishdan tortib, uni boyitish, chuqur qayta ishlash va tayyor mahsulot ishlab chiqarishgacha bo‘lgan to‘liq ishlab chiqarish zanjirini yo‘lga qo‘yishni rejalashtirmoqda.
2026 yil oxirigacha 12 ta investitsiya loyihasini ishga tushirish, mahalliylashtirilgan mahsulotlar assortimentini kengaytirish va yuqori tozalikdagi selen hamda tellur ishlab chiqarishni oshirish rejalashtirilgan.
Hozirda kombinatda besh turdagi muhim xomashyo — volfram, molibden, selen, tellur va reniy ishlab chiqarish o‘zlashtirilgan. Kelgusida yana 11 turdagi mahsulot, jumladan nikel, kobalt, grafit, surma, qalay, marganets, platina, vanadiy, simob va mis ishlab chiqarishni yo‘lga qo‘yish rejalashtirilmoqda.
Taqdim etilgan rejaga ko‘ra, 2030 yilga borib 16 turdagi muhim xomashyo bo‘yicha ishlab chiqarish hajmi $2,7 mlrd dan oshishi kerak.
Volframni chuqur qayta ishlash loyihalariga alohida e’tibor qaratildi. Ularni amalga oshirish uchun $1,1 mlrd investitsiya jalb etish ko‘zda tutilgan. 2030 yilga borib ushbu yo‘nalishdagi ishlab chiqarish hajmini qariyb $2,2 mlrd ga yetkazish rejalashtirilmoqda.
Shuningdek, noyob va noyob yer elementlari zaxiralariga ega yangi konlarni o‘zlashtirish, korxonaning resurs bazasini kengaytirish va investitsiya loyihalarini jadallashtirish imkoniyatlari ko‘rib chiqildi.
Taqdimotning ikkinchi qismi «Navoiyuran»ni rivojlantirishga bag‘ishlandi. Korxona ma’lumotlariga ko‘ra, so‘nggi yillarda uran xomashyosiga jahon talabi 15–20% ga oshgan. 2030 yilgacha uning yana 28% ga qo‘shimcha o‘sishi kutilmoqda.
Shu munosabat bilan geologiya-qidiruv ishlari va texnologik burg‘ilashni kengaytirish, ishlab chiqarish infratuzilmasini rivojlantirish, shuningdek, qo‘shimcha sorbsiya qurilmalarini ishga tushirish rejalashtirilmoqda. Ushbu chora-tadbirlar doirasida 250 ta yangi ish o‘rni yaratish nazarda tutilgan.
Ishlab chiqarishni kimyoviy reagentlar bilan ta’minlash masalalari ham alohida ko‘rib chiqildi. Buning uchun mahalliy sanoat korxonalari bilan kooperatsiyani mustahkamlash va texnik oltingugurt, sulfat hamda nitrat kislotasi yetkazib berishni oshirish rejalashtirilmoqda.
Bundan tashqari, muqobil texnologiyalarni qo‘llashni kengaytirish vazifasi qo‘yildi. 2030 yilga borib ishlab chiqarish jarayonlarida sulfat kislotasini almashtirish imkonini beradigan reagentlar ulushini 40% ga yetkazish mo‘ljallanmoqda.
Rejalashtirilgan loyihalar amalga oshirilishi natijasida uran qazib olish hajmini 2026 yilda 7,5 ming tonnadan 2030 yilga borib 15 ming tonnagacha oshirish rejalashtirilmoqda. Bunda aniqlangan zaxiralar 200 ming tonnagacha ko‘payishi kerak.
Taqdimot yakuniga ko‘ra, mas’ul idoralarga yangi ishlab chiqarishlarni o‘z vaqtida ishga tushirish, korxonalarning mineral-xomashyo bazasini mustahkamlash, yuqori qo‘shilgan qiymatga ega mahsulotlar ishlab chiqarishni oshirish va eksportni kengaytirish topshirildi.
Manba
